Facebook yakuyeho ubutumwa bwa Minisitiri w’intebe wa Ethiopia ivuga ko bwarenze ku mabwiriza y’uru rubuga nkoranyambaga yo kudahembera urugomo.

Ku cyumweru, Abiy Ahmed yasabye abaturage gufata intwaro bagahagarika inyeshyamba za Tigray People’s Liberation Front (TPLF).

TPLF imaze umwaka irwana n’ingabo za Leta ya Ethiopia. Mu minsi ya vuba ishize yafashe imijyi ikomeye. Facebook yagiye inengwa kudakora ibirushijeho ngo ibuze ko uru rubuga rukoreshwa mu guhembera urugomo.

Mu butumwa bwe, Bwana Abiy yavuze ko gutera intambwe kw’inyeshyamba kurimo “guhirikira igihugu ku rupfu rwacyo“, ashishikariza abaturage “kwitegura no gukora urugendo mu buryo [ubwo ari bwo bwose] bukurikije amategeko hamwe n’intwaro iyo ari yo yose n’imbaraga… mu gukumira, gusubiza inyuma no guhamba abakora iterabwoba ba TPLF”.

Umuvugizi wa Facebook, kompanyi nyir’uru rubuga iherutse guhindura izina ikiyita Meta, yabwiye BBC dukesha iyi nkuru ati: “Twamenyeshejwe ubutumwa bwa Minisitiri w’intebe wa Ethiopia tubukuraho kubera kurenga ku ngamba zacu zo kurwanya guhembera no gushyigikira urugomo.

Akomeza ati” Muri Meta, dukuraho ubutumwa bw’abantu cyangwa ibigo burenze ku mabwiriza yacu y’imikoreshereze y’urubuga, tutitaye ku bo bari bo”.

Mu butumwa bwinshi bwatangajwe mu kwezi gushize bitifuzwaga, byahishuwe ko Facebook yari yaraburiwe ko urubuga rwayo rwarimo gukoreshwa n’imitwe yitwaje intwaro yo muri Ethiopia mu guhembera urugomo ku moko ya ba nyamucye.

Ubwo yagezaga ikiganiro kuri sena y’Amerika mu kwezi kwa cumi, Frances Haugen wahoze akora muri Facebook yavuze ko iyi kompanyi “urebye yenyegeza urugomo rushingiye ku moko” mu turere turimo imirwano nko muri Ethiopia kubera kunanirwa kugenzura neza serivisi zayo hanze y’Amerika.

Abantu babarirwa mu bihumbi bamaze kwicwa mu ntambara yo muri Ethiopia, naho abandi babarirwa muri za miliyoni bataye ingo zabo, mu gihe ababarirwa mu bihumbi amagana babayeho mu nzara, nkuko bivugwa n’umuryango w’abibumbye (ONU/UN).

Imirwano yakajije umurego kuva mu kwezi kwa gatandatu uyu mwaka ubwo inyeshyamba zisubizaga igice kinini cya Tigray harimo n’umurwa mukuru wayo Mekelle. Ubu zibumbiye mu mutwe wa Tigray Defence Forces (TDF) uhuriwemo na TPLF n’indi mitwe yitwaje intwaro yaho.

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n’ingabo za Leta ya Ethiopia mu kwezi kwa cumi na kumwe mu 2020.

Abakuru ba TPLF bashwanye na Bwana Abiy ku bijyanye n’amavugurura muri politiki, nubwo kuba TPLF yarafashe ibigo bya gisirikare by’ingabo za Leta byo muri Tigray ari yo yabaye imbarutso y’igitero Leta yayigabyeho ku itariki ya 4 y’ukwa 11 mu 2020.

Leta ya Ethiopia ivuga ko TPLF ari umutwe w’iterabwoba, ariko TPLF yo ivuga ko ari yo Leta y’akarere ka Tigray yemewe n’amategeko.

LEAVE A REPLY

Please enter your comment!
Please enter your name here