Stade ya Kasarani yahagaritswe ku kwakira imikino mpuzamahanga

Impuzamashyirahamwey’Umupira w’Amaguru muri Afurika (CAF) yamenyesheje Ishyirahamwe ry’uyu mukino muri Kenya (FKF) ko Stade ya Nyayo n’iya Kasarani zitakiri ku rwego rwo kwakira imikino mpuzamahanga.

Ku wa Gatanu, tariki ya 29 Ukwakira 2021, ni bwo CAF yamenyesheje iki cyemezo nyuma y’igenzura ryakozwe kuri Nyayo Stadium ndetse n’iya Kasarani.

Yamenyesheje Ishyirahamwe ry’Umupira w’Amaguru muri Kenya (FKF) ko zombi zitari ku rwego rwo kwakira amarushanwa ya CAF na FIFA arimo imikino yo gushaka itike y’Igikombe cy’Isi n’icya Afurika ndetse n’ihuza amakipe.

Gusa, CAF yemereye iki gihugu ko gishobora kwakira umukino uzagihuza n’u Rwanda tariki ya 14 Ugushyingo 2021 mu gushaka itike y’Igikombe cy’Isi cya 2022 uzabera kuri Nyayo Stadium.

Ibi bibuga byombi byahagaritswe mu gihe Minisiteri ya Siporo muri Kenya yabishoyeho agera kuri miliyari 23,5 Ksh mu myaka itatu ishize kugira ngo bisanwe.

Mu bintu 10 Ishyirahamwe rya ruhago muri Kenya ryamenyeshejwe ko bigomba kwitabwaho mu ivugurura kugira ngo stade zahagaritswe zongere gukomorerwa, harimo gukora ikibuga kuri Nyayo Stadium, gukora neza urwambariro rw’amakipe n’abasifuzi no gushyiraho ahakorera itangazamakuru.

Amakipe ya Gor Mahia na Tusker FC akiri mu irushanwa Nyafurika rya CAF Confederation Cup akaba ashobora kuzajya gukinira mu bindi bihugu ku mikino azakira.

Mu ijonjora ribanziriza amatsinda rizakinwa hagati ya tariki ya 26 Ugushyingo n’iya 5 Ukuboza 2021, Gor Mahia izahura na Otoho D’Oyo yo muri Congo mu gihe Tusker FC izakina na CS Sfaxien yo muri Tunisia.

Nyayo National Stadium yubatswe mu 1983, ifite ubushobozi bwo kwakira abafana 45.000

1 COMMENT

LEAVE A REPLY

Please enter your comment!
Please enter your name here