Mbere ya Covid-19, ubucuruzi bwambukiranya imipaka hagati ya RDC n'u Rwanda bwari butunze benshi

Abakora ubucuruzi buciriritse bwambukiranya umupaka uhuza u Rwanda na Repubulika ya Demokarasi ya Congo bavuga ko Covid-19 ikomeje kubagiraho ingaruka zibatera ibihombo kubera ko urujya n’uruza rutarafungurwa nkuko byahoze mbere.

Aba bacuruzi bavuga ko batemererwa guherekeza ibicuruzwa byabo mu gihe byambutse mu gihugu kimwe bijya mu kindi, kuba bakwa laissez passer aho kuba agapapuro kazwi nka ‘Jeto’ hakiyongeraho no kuba basabwa kubanza kwipimisha iki cyorezo mbere y’uko bambuka.

Ubwo icyorezo cya covid-19 cyadukaga mu Isi, ibihugu byafashe umwanzuro wo guhagarika urujya n’uruza ku mipaka mu rwego rwo kwirinda ikwirakwira ryacyo. Ibi byagize ingaruka ku baturage by’umwihariko abari batunzwe no gukora ubucuruzi bwambukiranya imipaka.

Bavuga ko bikomeje kubateza igihombo n’impungenge kuko baba batizeye neza niba ibicuruzwa byabo biri kugurishwa ku giciro cya nyacyo, cyane ko baba batahibereye iyo babyohereje.

Iki cyorezo gitangiye kugenza make, abakora ubucuruzi buciriritse bwambukiranya umupaka uhuza u Rwanda na Congo, basabwe kwibumbira mu makoperative bakajya bapakira imodoka ibicuruzwa byabo ikabijyana.

Uwamahoro Jeannette ukora ubucuruzi bwambukiranya imipaka ku mupaka wa Rusizi ya kabiri, yabwiye Igihe ko kubera icyorezo cya covid-19 bibagora kubona impapuro z’inzira zibemerera kwambuka umupaka.

Ati “Muri iki gihe ukuntu ducuruza ni ku matelefone, iyo ibicuruzwa bigezeho, umukiriya areba igicuruzwa yagishima mukavugana akakwishyura, ariko akenshi baraduhenda kuko tuba tutahibereye”.

Uwamahoro akomeza avuga ko kubera icyorezo cya covid-19, bamwe muri bo igishoro bakiriye bakaba bari kwiyubaka bundi bushya. Agasaba ko niba byashoboka bakoroherezwa ku giciro cy’igipimo cya covid-19.

Ati “Igipimo cya covid ni ibihumbi 5 Frw kikamara iminsi 15. Nk’uko nabikubwiye ko muri covid abagore bagumye mu rugo bigatuma barya umutahe, ni ingorane, tukaba turi gusaba ko twakorerwa ubuvugizi, ku buryo kiriya gipimo nibura bagishyira ku kwezi kikamara”.

Bitegetsimana ukoresha umupaka wa Petite Barrière mu karere ka Rubavu, avuga ko icyorezo cya covid cyakomye mu nkokora iterambere yakuraga mu bucuruzi.

Ati “Mbere byari akazi kagaragara kuko nkanjye sinaburaga kwinjiza inyungu iri hagati y’ibihumbi 200 na 300 mu cyumweru bitewe n’urujya n’uruza ariko ubu byaranze ni ukwanga kwicara. Badufashe imipaka ifungurwe dukoreshe indangamuntu nka kera ariko tunirinda covid 19’’.

Ufitinema Solange avuga ko kwambutsa ibicuruzwa mu matsinda bituma bahura n’ibihombo kuko iyo bigezeyo hari ubwo ibiciro babihindura cyangwa bakahindura ibiro asaba ko imipaka yafungurwa bakajya bigirayo.

Ati “Ubu twambutsa mu matsinda ibicuruzwa bikagenda n’imodoka akenshi hari ubwo iyo bigezeyo usanga ibiro byagabanutse cyangwa bagahindura ibiciro kuko uba udahari. Turasaba Leta ko yadufasha rwose imipaka igafungurwa tukajya twijyanira ibicuruzwa byacu banadufashe dukoreshe indangamuntu’’.

Tariki 5 Ugushyingo 2020 nibwo abacuruzi bakora ubucuruzi bwambukiranya imipaka bo mu karere ka Rubavu no mu mujyi wa Goma muri Repubulika iharanira Demokarasi ya Congo bakomorewe mu rwego rwo koroshya ubuhahirane.

Guverineri w’Intara y’Iburengerazuba Habitegeko François yabwiye IGIHE ko ibyo aba bacuruzi basaba, kubyemererwa bisaba ko impande zombi u Rwanda na Congo bazicara bakabiganiraho bagafata umwanzuro.

Yagize ati “Hari byinshi byakozwe kugira ngo tuborohereze, ariko nk’uko mubizi icyorezo kiracyahari. Dushobora gufata ingamba zoroshya hano, ariko biba bigomba kumvikanwaho n’impande zombi. Bityo usanga icyo abantu bifuza kidahita gishoboka.”

“Nk’icyo kijyanye n’ibyangombwa, twe dusanga jeto nta kibazo abantu bayambukiraho, ariko bisaba ko urundi ruhande narwo rubyumva gutyo, icyo navuga ni uko hari ibiganiro bikomeje hagati y’impande zombi, ariko byose bikorwa mu nyungu zabo no kugira ngo boroherwe”.

U Rwanda rwohereza muri Repubulika Iharanira Demokarasi ya Congo ibicuruzwa binyuranye byiganjemo ibikomoka ku buhinzi n’ubworozi, naho Congo yohereza mu Rwanda ibicuruzwa byiganjemo amamesa n’ibinyobwa bikorerwa mu nganda.

LEAVE A REPLY

Please enter your comment!
Please enter your name here